Scéalta Nuachta ó Leabhar Breac

Rentrée Littéraire Leabhar Breac

Trí leabhar ón bhFrainc atá againn do Rentrée Littéraire Leabhar Breac — dhá úrscéal ghrafacha nua a chuirfidh go mór le réimse is le rogha na n-úrscéalta grafacha atá ar fáil i nGaeilige agus scéinséir dorcha a suitear ar shráideanna grianlasta na Meánmhara — agus iad ar fad ar fáil ar sladmhargadh na Nollag.

Hervé BourhisAr na húrscéalta grafacha is deireanaí ó Leabhar Breac i mbliana tá na bandes dessinées Fraincise An Broc-Chú 2: Ar Ais i mBun Gnóthaí le Hervé Bourhis agus An Leathanach Bán le Boulet agus Pénelope Bagieu. Dhá cheann déag d'úrscéalta grafacha atá ar fáil ó Leabhar Breac anois, agus an rogha agus an réimse á leathnú bliain i ndiaidh bliana.

An Broc-Chú ar ais i mBun Gnóthaí

Te sna sála ar An Broc-Chú 1 (2016) tá Guy Farkas 'An Broc-Chú' ar ais againn leis an dara leabhar sa tsraith, agus é tar éis tréimhse a chaitheamh ar a theitheadh sa Bhrasaíl. Tá sé ar ais san Eoraip anois, agus é ar ar ais i mbun gnóthaí! Tá jab aige: teacht ar iarcheannaire an chomhlachta cógaísíocht idirnáisiúnta Duprat — fear atá ar a theitheadh ón dlí é féin — agus é a thabhairt ar láimh do na póilíní.

Pénélope Bagieu agus BouletTóraíocht é seo a thugann é ar láithreáin scannánaíochta craicinn go dtí cóisir dhrúisiúil i chateau faoi rún agus go cillín i bpríosún Francach. Fearacht an chéad leabhar sa tsraith, leabhar é seo atá cruálach scaití, scaití eile searbhasach, ach é thar a bheith greannmhar!

Leathanach Nua ó Phénélope Bagieu

Ón ealaíontóir céanna a scríobh agus a dhearaigh Corp an Duine Uasail, leabhar a bhí ar ghearrliosta Ghradam Uí Shúilleabháin i mbliana, tá An Leathanach Bán againn — leabhar atá an-ghreannmhar agus a bhfuil an-doimhneas ann chomh maith. Tosaítear ar an scéal leis an bpríomhcharachtar, bean óg sna fichidí, ag iarraidh teach chuici féin ar bhínse sráide i bPáras. “Beidh ‘chuile shórt go breá," ar sí. "Tá seoladh agam, agus ticéid ar an metro ... agus mapa de Pháras. Chuile shórt go breá. Tiocfaidh sé ar fad ar ais chugam faoi cheann nóiméid.” Níl cuimhne aici ar a hainm, nár ar an bhfáth a bhfuil sí san áit sin. Tá a cuimhne tar éis imeacht uirthi.

Le greann, le comhbhá agus le tuiscint, insíonn Pénélope Bagieu agus Boulet scéal na tóraíochta seo, tóraíocht na féiniúlachta ar shráideanna Pháras. 

Scéinséir ar Bhruach na Meánmhara

Total KhéopsI Mí Dheireadh Fómhair a foilsíodh an t-úrscéal próis (gan aon phictiúir an iarraidh seo!) Kíor Thuathail (Total Khéops) le Jean-Claude Izzo, scéinséir dorcha ó chósta na Meánmhara agus é aistrithe ag an bhfile Bernadette Nic an tSaoir. Aistriúchán é seo a foilsíodh le cúnamh speisalta ón CNL (Centre National du Livre na Fraince).

Scéal triúr atá anseo, triúr a d'fhás suas in éindí ar shráideanna grianlasta Mharseille agus a raibh grá acu don aon chailín amháin, don ghiofóg álainn Lole. Dlúthchairde ab ea iad le linn a n-óige. Scarann an saol iad, ach tugann an bás ar ais le chéile iad.

Scéal Mharseille atá ann freisin — ó chúlsráideanna an Phanier go dtí an Canabière agus anuas go dtí an seanchalafort — agus ar na Francaigh, na hIodálaigh, na Spáinnigh agus na hArabaigh arbh iad pobal na cathrach sin iad.

Earra é seo atá an-ghann sa réimse leabhar atá ar fáil don Ghaeilgeoir, scéinséir crua láidir a bhfuil toirt agus meáchan ann. Toradh é, gan dabht, ar an saothrú atá ar bun ag Leabhar Breac i ngort na Fraincise le tamall beag de bhlianta, agus is cinnte go mbainfear an-sásamh as!

© Leabhar Breac 2017

 

Fill ar News